قصة تأسيس المنتدى

تذكير بمساهمة فاتح الموضوع :

[postbg=https://i.imgur.com/lRuwoVi.png]                        

  قصة تأسيس المنتدى

اليوم 13.6 يوم عظيم بالنسبة الي ، لانه بهاد اليوم عملت المنتدى فحبيت بهاي المناسبة أكتبلكم قصة تأسيس المنتدى .

بتاريخ 12.6 بالليل كانت العضوة tΉẻ pŘỊNċЁsŜ نايمة عنا وأكيد كلكم صرتوا تعرفوا انها بنت عمتي ، وكنا قاعدين وسهرانين ، وكانت أختي الكبيرة بتحكيلنا قصص رعب ، واحنا والصلاة على النبي بتعرفوا عصبنا قوي ، المهم ناموا خواتي الخمسة وضلينا "أنا "و"لينا" مش عارفين ننام ومنتوهّم باللي حكته أختي .

كنا نتحدث عن المنتديات ، وخصوصا عن منتدى مسجلين "أنا" و"اياها" فيه ، بعديها حكيتلها عن تجربتي الأولى في عمل منتدى ، صحيح كانت التجربة فاشلة جدا وما جمعت غير 6 أعضاء ، بس "أنا" حاولت وكمان كان عمري كتير صغير وقتها .
ومن خلال الحكي اجتلنا فكرة عمل المنتدى ، وتحيّرنا كتير باسمه ، كنا بالأول حابّين يكون متعلق بالفلسطينية ، بس بعدين اقترحت "لينا" انه نسمّيه باسم أختي الصغيرة "بسملة" ، وأعتقد وقتها كانت الساعة 3.5 الفجر .

وفي اليوم التاني "لينا" روّحت و"أنا" فتحت النت وعملت المنتدى ، هو يعني كنت أكبس هون وهناك .. "أنا" مش عارفة على شو بكبس بس المهم في النهاية زبط .
حكيت مع "لينا" وقلتلها اني عملته وفتْحَت عليه وبدينا نحط مواضيع ونعلّق ، وبعد بأسبوع تقريبا سجّلت أختي الصغيرة في المنتدى "لجين" (بنت فلسطينية) وبدت تساعدنا .

كنّا مُغرمين بالمنتدى لدرجة ازا دخل زائر كنا نكيّف ونعمل حفلة ، ضلينا وقت واحنا منستنى الأعضاء وما يئسنا ، بصراحة ما بتذكر مين سجّل أول حدا ، بس بعرف يومها كنا كتير مبسوطين ، ومرت الأيام والأعضاء ييجوا اما لحالهم أو احنا نجيبهم ، ويمكن كانت العضوة (فلسطينية بريئة وجريئة) "عدن"من أوائلهم ، وهون بحب أوقف بين السطور وأشكرها كتير لانها بذلت جهد وساعدتنا كتير وكانت عضوة نشيطة واستحقت تكون نائبة المديرة .

آسفة نسيت شغلة كان لازم أحكيها قبل "عدن" كنت مسجلة بمنتدى ما في داعي أحكي اسمه دعيت مدير هداك المنتدى اللي اسمه "عمر" حتى يسجّل بمنتداي ، ووافق وحطيته مدير وساعدني كتير والله .
كانت فترة ادارته محدودة عملّي تعديلات على المنتدى وبعدين شلت الادارة منه بس ضل معه اشراف عالدردشة ، وبعد مدة صرت أحس في اشي غريب بالدردشة (بتعرفوا أنا عندي الحاسة السادسة) فشلت منه الاشراف .

مرت الأيام و"أنا" أجيب أعضاء و"عمر" يجيب أعضاء و"لينا" تجيب أعضاء وفي أعضاء يسجلوا لحالهم .
وفي يوم من الأيام سجّل شخص في المنتدى اسمه "ابراهيم"، أنا فكّرته متل كل الأعضاء ، بس طلع أحسن بكتير وعرض خدماته في تصليح المنتدى ، "أنا" بالأول كنت متشككة وخايفة أعطيه الادارة ، بس بعدين احساس جواي حكالي مارح يصير شي وبالفعل ترتّب المنتدى وصار متل ما انتوا شايفينه هلأ وحطينا قوانين وبدينا نتعامل مع المنتدى بشكل منظّم ، و"أنا" ما بقدر غير اني أشكر هاد الانسان الرائع اللي ساعدنا بدون أي مقابل .

وفي هاد الوقت صارت مشاكل بين المدير "ابراهيم" وبين العضو "عمر" مش بالضرورة أذكرها ... فتم اخراج "عمر" من المنتدى .
بعد هاد الحكي بفترة ، تهكّر المنتدى وتم حذف غالبية الأعضاء ، وقتها اللي شاف المنتدى ما بسدّق انه هاد "منتديات بسملة" وتأثرت كتير وصرت أبكي ، حسيت كل تعبي وتعب غيري راح بالهوا ، صراحة لو كنت لحالي ما عرفت شو أعمل وكان المنتدى ما رجع ، بس "ابراهيم" كانت مهارته أكتر بكتييير من مهارتي بعالم المنتديات ، بتقدروا تحكوا "أنا" ما بفهم حتى بالمنتديات .. بذل كل جهده حتى يرجع المنتدى ، ومين ما كان اللي هكّر المنتدى وقتها الله يسامحه لاني ما تعلمت من أهلي غير المسامحة وان شاء الله ما يرجع يعيدها مرة تانية .

ومرت الأيام ومنتدانا يكبر فيكم لحتى اجا اليوم اللي بحب أرجع وأشكر الناس اللي تعبوا كتير على المنتدى ، في البداية أكيد رح أشكر "لينا" شكر خاص وكبير لانها ساندتني كتير بالمنتدى واللي وقفت معي من البداية ..
بعدها بحب أشكر "عدن" لانها كمان مدّت يد العون وكانت نشيطة وساعدتنا في المنتدى ..
وأنا من واجبي كمان أشكر "عمر" لانه لولاه ما كان تعرفت عليكم ..
وبحب أشكر "أمل" و"أحمد" و"نوران" وكل المشرفين والمشرفات الغاليين ..
باختصار بحب أشكر كل عضو بمنتدانا كان يفتح من قبل ونسينا ، او لهلأ بيفتح بما فيهم "محمد" و"محمد" و"بلال" و"سوما" و"فداء" و "ahk" و"هبة" و"غزل" ...
ان شاء الله ما بكون الزهايمر شغال وما أكون نسيت حدا ، وأكيد ما رح أنسى "ابراهيم" لانه تعب كتير على المنتدى ..

طوّلت عليكم كتير لهيك بحب أشكركم لانكم تحمّلتوني وقرأتوا كل القصة للآخر ، وبتمنى المنتدى يكبر أكتر وأكتر أكيد فيكم وفي تواجدكم الدائم ونشاطكم على طول بالمنتدى ، وان شاء الله يكون عامنا الجديد أفضل وأحسن من العام اللي مضى ، وربنا يوفقنا جميعا ويئدّرنا نساعدكم بالمنتدى ..


[ندعوك للتسجيل في المنتدى أو التعريف بنفسك لمعاينة هذا الرابط]


تحياتي لكم
"تسبيح" ...


كُتب بتاريخ
7.6.2014

فلسطينية بريئة وجريئة كتب:

أنا بحب أشكر كتير جهودك الواضحة في رقي وازدهار المنتدى الرائع 
والحد لله انو رجع المنتدى وما راح تعبك 

وكان منتدى كتير رائع لما سجلت فيه أول مرة 
وحبيت انو يكون من المنتديات المعروفة 
والحمد لله هلأ المنتدى عم يزيد من مواضيعه وردوده وأعضاؤه ورقي 


كانت فرصة حلوة إني تعرفت عليكي وع لينا 


♥

العفو حبيبتي انا ما عملت غير واجبي
الحمد لله
الفرصة الاحلى الي حدثت بالمنتدى نا اتعرفنا عليكي ونورتينا
أهلا وسهلا فيكي بموضوعي
نورتي

كــــــــــــــل عــــــام والـــــجـــــــمــــــــــــيـــع بــــــألــــــــف خـــــيـــــــــر

ابــــدعتي